Nakakabulag na Kinabukasan

Sa pag-usbong ng mga makabagong teknolohiya, mas pinaangat na bersyon ng teknolohiya kasama rito ang pagkabuhay ng social media, bilyon-bilyon na ang nahuhumaling sa kung ano ang nakikita at nadidinig natin dito. Ginagamit ang social media dahil maaaring makatulong ito sa ating pang-araw-araw na gawain, mga pangangailangan at mga gusto nating makuha sa buhay. Walang pili sa edad, propesyon o di kaya’y katayuan sa buhay ang maaaring gumamit ng social media. Kahit nga mga musmos pa lamang ay maalam na sa pasikot-sikot at pagmamanipula sa mga ganitong bagay, mas marunong pa ang mga batang gumamit ng mga cellphones at kompyuter kaysa sa mga matatanda. Mas gusto pa nilang hawakan ang kung anong gadyet, kesa lumabas at maglaro sa ilalim ng sikat ng araw. Isa na itong malaking pagbabago sa henerasyon ngayon. Makakakita ka nalang ng mga lola na naka-headset sa daan, mga guro ay laptop at tv na ang ginagamit imbes na maghanda ng mga charts, at karamihan sa kabataan ngayon ay nilamon na ng iba’t-ibang social networking sites, hindi natatapos ang araw kapag hindi nakapag-update ng status sa kani-kanilang accounts.

Sa mga pagbabagong ating nararanasan ngayon dahil sa social media, ano sa tingin niyong epekto nito sa ating buhay? Anong meron sa social media at malaking bahagi na ng ating mga buhay at pagkatao ang sinakop nito?

Kinahuhumalingan ngayon ng karamihan ang iba’t-ibang social networking sites na matatagpuan natin sa internet, ilang na rito ang Twitter, Yahoo, Instagram at Facebook. Maaari tayong makakuha ng mga impormasyong panlipunan at pandaigdig sa mga social networking sites o di kaya’y magbahagi ng mga pang-araw-araw na pangyayari sa ating buhay. Dito rin natin matatagpuan ang mga trending o uso na mga bagay o gawi na hindi natin dapat makaligtaan at hindi dapat tayo magpahuli.

Mapapadali ang pagkalap ng mga impormasyon at hindi na kailangan pang bumili ng dyaryo para lang may alam sa mga balitang panlipunan. Ngunit hindi lahat ng impormasyong nakukuha natin galing sa social media ay totoo. At hindi sa lahat ng pagkakataon nakakabuti sa’tin ito.

Laganap na sa kasalukuyan ang pagkalat ng fake news o mga pekeng balita sa social media, mga balitang pinaniniwalaan naman agad ng mga tao porket nanggaling ito sa social media. Diyan tayo nagkakamali, hindi lahat ng ating nakikita at nababasa sa social media ay totoo, hindi lahat ng impormasyon ay mapagkakatiwalaan at ang responsable sa mga balitang ito ay ang mga taong walang magawa sa kanilang buhay. Ang mga ganitong balita ay nagdudulot ng kalituhan sa nakararami, kaya dapat nating kilatising mabuti ang mga impormasyong nanggagaling sa social media.

Isa pang laganap ngayon sa social media ay ang cyber-crime, isa dito ay ang pornograpiya. Karamihan sa atin ngayon ay ginagamit ang social media upang magbenta ng katawan dulot narin ng kahirapan. Ang ilan pa nga ay ang mga magulang pa nga ang naghihikayat sa mga anak para gumawa nito. At sa tingin niyo ba nakakabuti ito sa ating reputasyon at pagkatao? Hindi.

Sa tingin niyo ang mga pagbabago ngayong nagaganap sa ating mundo ng dagil sa teknolohiya ay nakakabuti sa ating mga tao? Maaaring oo, maaaring hindi, Walang kasiguradohan. Maaaring ito ang maging dahilan upang mabulag tayo sa mga katotohanang maaaring ipagkait sa atin at maaaring magdulot ng malabong kinabukasan.