Kalusugan, hindi sigurado sa bakuna

Ang Pilipinas ang pinakaunang bansa sa Asya na pinayagang ibenta ang pinakaunang bakuna laban sa dengue. Ang bakunang ito ay tinatawag na Dengvaxia, gawa ng French pharmaceutical giant na Sanofi, inaasahan ito na maging solusyon sa tumataas na mga kaso ng dengue sa ating bansa at maiwasan ang milyon-milyong namamatay dahil sa dengue.

Sinimulang ipamahagi ang Dengvaxia sa Pilipinas noong Abril ngayong taon, ngunit pinatigil na ngayon ang pagbabahagi ng gamot na ito dahil hindi pa sigurado kung ito nga ba ay garantisadong malalabanan ang mga lamok na nagdudulot ng dengue. Kaya sinuspende muna ang pagbabahagi ng bakunang ito at suportado naman ito ng World Health Organization (WHO) dahil inamin din naman ng lumikha nito, ang Sanofi Pasteur, na epektibo lamang ang bakuna sa mga dating nagkaroon ng dengue.

Kahit na bumaba ang kaso ng dengue sa Pilipinas dahil sa pagbabahagi ng bakuna na Dengvaxia, hindi dapat tayo makampante sapagkat maaaring malagay sa alanganin ang kalusugan ng mga mamamayan.

Kaugnay nito ay ino-obserbahan na ng Department of Health ang mga batang naturukan ng bakuna kung meron ba itong nararamdamang kakaiba simula nung binakunahan ng Dengvaxia. Maaaring may mga side effects ang bakunang ito kaya hindi na muna ipinagpatuloy ang pagbabahagi nito. Nababahala ang mga magulang ng mga batang binakunahan ng Dengvaxia dahil baka ito ay magdulot ng ibang sakit sa katawan ng kanilang mga anak.

Kapag hindi pa nagkaaroon ng sapat na ebidensiya na ito’y epektibo talaga at walang mga side effects na maaaring sumira sa ibang bahagi ng katawan, hindi na dapat ito ibahagi sa mga mamamayan dahil mananagot talaga ang gobyerno dito, lalo na ang Department of Health.

Sa ngayon humahanap ng paraan ang buong bansa lalo na ang ahensiya ng Department of Health at ang lumikha ng Dengvaxia, ang Sanofi Pasteur, upang mapatunayan na ang bakunang ito ay epektibo para sa pagsugpo ng mga kaso ng dengue.

Wala pa talagang siguradong bakuna upang maiwasan ang mga lamok na nagdadala ng dengue, hindi dapat tayo nakadepende sa mga ganitong gamot. Upang maprotektahan natin ang ating mga sarili, ang buong bansa at ang bawat mamamayan panatilihin ang kalinisan sa buong kapaligiran. Maging mapagmatyag sa kapaligiran upang mga sakit ay maiwasan.